Partizani barazoi dje 1-1 në derbin me Dinamon. Sfida e zhvilluar në “Elbasan Arena” pa në fushë dy skuadra agresive, që u takuan pas tetë vitesh e gjysmë në derbi, duke ndarë nga një pikë. Në këtë duel, Demat e Dajës sërish nuk kishin vendosur në krahët e fanellës sponsorin e Superligës.
Logo e “Abissnet Superiore” mungonte në fanellën e Partizanit, që e përkthyer do të thotë 50 mijë lekë të rinj gjobë. Kaq u dënua Partizani edhe javën e fundit nga Disiplina, ndërsa të njëjtin fat kishte edhe Teuta.
Nuk dihet nëse kjo është një protestë e heshtur e klubeve apo një mosdijeni për vendosjen e logos së re.
“FK Partizani, për mosrespektim të Rregullores së Veprimtarisë Futbollistike, duke mos vendosur stemën e Abissnet Superiore, në mëngën e djathtë të fanellës së lojës, në bazë të neneve 63.1, 82.1 të Rregullores së Veprimtarisë Futbollistike dhe nenit 14 të KDS dënohet me gjobë në masën 50.000 (pesëdhjetë mijë) lekë”, thuhej në vendimin e djeshëm të Disiplinës.
