Situata e pandemisë në Shqipëri në 7 ditët e fundit duket se është rënduar përsa i takon numrit të viktimave. Nga data 19 shtator deri në 25 shtator, kanë humbur jetën 55 qytetarë, ndërsa janë regjistruar 5181 raste të reja.
Krahasuar me një javë më parë, numri i viktimave në 7 ditët e fundit ka pësuar një rritje me pothuajse 45 %, ndërkohë që bazuar në të dhënat zyrtare të Ministrisë së Shëndetësisë, po marrin trajtim spitalor 214 persona, 26 prej të cilëve ndodhen në gjendje të rënduar.
Ekspertët kanë paralajmëruar se me nisjen e vitit të ri shkollor, mund të ketë një rritje të infektimeve, edhe pse pohohet se ka një ulje të kurbës së rasteve të reja, krahasuar me dy javët e fundit.
Gjithsesi bazuar në të dhënat zyrtare, java që sapo u mbyll, ka regjistruar shifrat më të larta, në të paktën 5 muajt e fundit sa i përket humbjes së jetëve njerëzore.
Ndoshta niveli i ulët i testimeve, një problem ky i evidentuar që nga fillimi i pandemisë, dhe mungesa e masave inteligjente për të vendosur nën kontroll pandeminë, kanë ndikuar në shtimin e rasteve, ku Tirana ka 5264 raste nga 11945 që janë në total.
Pas Tiranës, qarku më i prekur është Fieri me 1168 dhe më pas renditen Durrësi dhe Shkodra, përkatësisht me 1127
dhe 1074 raste aktive.
