Ish-Kryeministri Sali Berisha në takimin me anëtarët e Partisë Demokratike në Vlorë, akuzoi kreun demokrat Lulzim Bashës, se pas 8 vitesh të një keqqeverisje të Edi Ramës, të skandaleve të njëpasnjëshme të Qeverisë së tij, nuk arriti të marrë as votat e vitit 2013.
Berisha tha se opozita nën drejtimin e Lulzim Bashës shkoi nga humbja në humbje, nga disfata në disfatë.
“Ia kishin thënë Bashës që në 2017 se je lider i thyer, i kam thënë se nuk bëhej dot lider. Ai vrau politikisht bashkëpunëtorët, i ekzekutoi politikisht sepse nuk i pëlqenin. Zgjodhi t´i ekzekutonte politikisht në pritë natën”, tha Berisha.
Ai u shpreh se në 2021, PD nën drejtimin e Lulzim Bashës, mori 12 % më pak vota se PD e vitit 2013 që e drejtonte Sali Berisha.
Duke iu rikthyer zhvillimeve në PD, Berisha tha se sa herë ka pasur probleme në Vlorë apo Fier, kryetarët janë votëbesuar, ndërsa nën drejtimin e Lulzim Bashës kjo nuk ka ndodhur.
“Basha synonte me çdokusht të krijonte liderin, por harronte se nuk mund të bëhej lider, pa fituar zemrat e demokratëve”, tha Berisha.
Ndërsa e cilësoi Bashën ish-kryetar të PD, Berisha tha se “humbja në 25 prill ishte e madhe, pavarësisht se Edi Rama bleu votat, hodhi miliona euro”.
“I tregova Lulzim Bashës të gjithë skemën e 2001, se si ne arritëm të rrëzonim raportin. Por çfarë bëri Lulzim Basha? Në vend që të denonconte përdorimin e krimit, blerjen e votës, patronazhistët, u mor me karrigen e tij, sepse kishte frikë, dhe kjo është absolutisht tradhëtia ndaj 600 mijë shqiptarëve që votuan për PD”, tha Berisha
Në ‘Foltoren’ e tij me qytetarët vlonjatë, Berisha gjithahstu ka sulmuar Edi Ramën si kryeministrin më të keq.
Ai u shpreh se në 8 vite Shqipëria u shpopullua njëlloj sikundër të qeveriste serbi Vaso Çubrilloviçi.
“Vijmë sot pas 8 vitesh të qeverisjes më të keqe që vendi ka njohur nga diktatura komuniste.
Vijmë sot kur Edi Rama me qeverisjen e tij ka kaluar çdo rekord të zi dhe e ka shndërruar Shqipërinë në delen e zezë të Europës.
Shqiptarët pakësohen çdo javë, çdo muaj, njëlloj sikundër të qeveriste serbi Vaso Çubrilloviçi me platformën e tij.
Në 8 vite largoi mbi 550 mijë shqiptarë nga Shqipëria. 15 fishoi prokurimet sekrete që janë vetëm vjedhje. I mbylli Shqipërisë dyert e hapjes së negociatave dhe ndërtoi në Europë narkoshtetin e parë në këtë kontinent. Bllokoi procesin e integrimit drejt BE.
Këto 8 vite kanë qenë shumë të rënda për ju. Vitet që shqiptarët nga qytetarët me rrogat mesatare më të larta në rajon, ranë në rrogat më të ulëta në rajon, 30% më të ulëta se në Kosovë”, u shpreh ish-kryeministri Sali Berisha.
