Nën thirrjet “Rama ik” dhe “O Sali o hero, gjithë Shqipëria ty të do”, disa qindra anëtarë të Partisë Demokratike kanë pritur ish-Kryeministrin Sali Berisha në turin e takimeve me anëtarësinë e PD.
Berisha ka udhëtuar drejt Fierit në takimin e dytë të asaj që e quan “Foltorja”, një seri takimesh që po zhvillohen pas vendimit të kreut demokrat Lulzim Basha për përjashtimin e ish-Kryeministrit nga Grupi Parlamentar.
Me qëllimin për një Parti Demokratike më të fortë, më të bashkuar dhe më të hapur, Berisha duke iu drejtuar demokratëve të Fierit, tha se përulet me nderim të madh para tyre, sepse nën drejtimin e degës së PD, Fieri është shndërruar në qëndresën më të fuqishme ndaj narkoshtetit.
“Sot ne mblidhemi këtu me një motiv, ai që buronte nga zemrat tuaja “Rama ik”. Pas Enver Hoxhës, Edi Rama do të mbetet në histori si Kryeministri më i keq, më i lig, më tradhëtar i Shqipërisë dhe kombit shqiptar”, tha Berisha.
Në vijim, ish-Kryeministri tha se në 8 vitet e qeverisjes Rama, Shqipëria ka zbritur në vendin e fundit përsa i takon rrogave dhe pensioneve, me 30 % më pak se Kosova.
“Rama e nisi mandatin e 3-të me një autoveturë luksoze 500 mijë euro. Mafia e plehrave me në krye Edvin ramën ju ka vjedhur juve me qindra milionë euro nga taksat e shqiptarëve”, tha Berisha.
