Javën e ardhshme, i deleguari i posaçëm i BE-së për dialogun Prishtinë-Beograd, Miroslav Lajçak, do të vizitojë Kosovën.
Sipas mediave kosovare, Lajçak do të takojë kryeministrin Albin Kurti dhe udhëheqësin e delegacionit të Kosovës Besnik Bislimi.
“Ne do ta presim për vizitë z. Lajçak në mesin e javës së ardhshme, gjatë së cilës do të takohet me kryeministrin Kurti dhe zëvendëskryeministrin Bislimi”, ka thënë zëdhënësi i qeverisë.
Sipas Koha.net, qëndrimi i Lajçak në Kosovë vjen në kuadër të dialogut Prishtinë-Beograd. Vizita e ardhshme e Lajçak do jetë në Serbi ku do takohet me Vuçiç.
“Lajçaku, pas raundit të fundit të dialogut, ka pranuar se palët janë shumë larg njëra -tjetrës me qëndrime dhe se mbetet shumë punë për t’u bërë. Në fakt, edhe Lajçaku është duke u përballur me faktin se pas 1 viti e gjysmë prej kur ka nisur mandatin nuk ka pasur lëvizje pozitive në dialog, e lërë më afrim për një marrëveshje gjithëpërfshirëse për normalizimin e raporteve” – shkruajnë mediat kosovare.
Pas takimit me përfaqësues të delegacionit të Serbisë, zëvendëskryeministri Besnik Bislimi, të mërkurën ka deklaruar se gjatë muajit shtator nuk do të ketë takim të nivelit të lartë. Sipas tij, e gjithë kjo për shkak të mospërparimit të mjaftueshëm për të organizuar një takim të tillë.
