Ish-kryeministri Sali Berisha u prit para Kuvendit këtë të Premte nga një grup mbështetësish. Më tej, në hyrje të Kuvendit, Berisha është pritur nga Edi Paloka, Flamur Noka dhe Tritan Shehu.
Në një mesazh para nisjes së seancës plenare, që shënon dhe legjislaturën e re, Berisha foli për “pazare të fëlliqura të Bashës me Ramës”. Berisha tha se emergjencë është rivendosja në PD të sovranitetit e legjimitetit “të grabitur poshtërsisht me marrëveshjen Rama-Basha”. Ai shtoi se PD do dali nga kjo betejë më e fortë.
“Partia Demokratike del nga kjo betejë më e fortë, më e sigurt se kurrë në fitore. Rroftë Partia Demokratike, rroftë Shqipëria”, u tha Berisha mbështetësve të tij.
“I vetmi që do të marrë përgjigjen që meriton është njeriu që shet PD me pazare të fëlliqura me Edi Ramën. Lëvizja ime e radhës do të jetë një lëvizje statutore e tëra e bazuar në rivendosjen e legjitimitetin dhe sovranitetit të PD, të grabitur poshtërsisht në marrëveshjen Rama-Basha”, u shpreh ai.
