Zv.ministrja e Shëndetësisë, Eugena Tomini, ka folur në studion e News24 për ecurinë e vaksinimit deri më tani në vendin tonë dhe trendin e viktimave e të infektimeve nga COVID-19 e variantet e saj.
Tomini theksoi se vaksinimi duhet të kryhet nga të gjithë popullsia, sidomos nga grupmoshat e riskut. Ajo nënvizoi se bërja e vaksinës, do të thotë që do të ketë më pak shtrime në spitale e viktima nga virusi.
Sakaq, Tomini tregoi se varianti Mu ende nuk ka hyrë në Shqipëri, por sipas saj, varianti me më shumë ndikim deri më tani është ai Delta, që aktualisht ndodhet në vend. Sa i përket orës policore ajo tha se do të mbetet e pandryshuar, por do të ketë vlerësime në bazë të dinamikës së COVID-19, ndërsa bëri sërish thirrje për studentët, mjekët e mësuesit që të vaksinohen, në mënyrë që mësimi të kryhet nëpër klasa e auditore.
“Është ndjerë trend më i lartë i aplikimit të vaksinave. Sigurisht impakti dhe mbledhja pas frekuentimit të verës pa limite, bëri që popullata të ketë trend në rritje dhe interes sa i përket vaksinimit. Janë deri në 14 mijë aplikime në ditë. Ndërgjegjësim për vaksinim të popullatës vlen në të gjitha daljet televizive”, tha ajo.
