Besnik Mustafaj, ish-deputet dhe ish-ministër i Jashtëm në Qeverinë Berisha, i distancuar për disa vite nga PD dhe më pas i ofruar nga kreu demokrat, Lulzim Basha, ka zgjedhur t´i japë një këshillë kryedemokratit se si mundet të largojë ish-Kryeministrin nga Grupi Parlamentar i PD-së, bazuar në një kërkesë të ambasadores amerikane, Yuri Kim.
Në pozicionin e një analisti, Mustafaj u shpreh në studion e ABC, se vendimin për Berishën nuk mund t´a marrë Kryesia as Basha, por Këshilli Kombëtar dhe Grupi Parlamentar, përmes një votimi të fshehtë, pa debat.
“Po ta zgjidhë vetë Berisha thjeshtohen gjërat. Ka gjasa? Nuk e di nuk shoh ndonjë shenjë. Ka thënë që do të jetë në parlament dhe më aktiv. Ky nuk është një vendim që duhet ta marrë vetëm dhe vetëm me kryesinë. Nëse Basha ka mendimin që ta përjashtoja nga grupi, vendimi duhet ta marrë këshilli kombëtar dhe grupi parlamentar me votim të fshehtë pa debat. Këtë duhet ta kërkojë kryetari i PD-së.
Nuk mund ta marrë ai, ta mbajë ai, një barrë të tillë. Në kushtet që nuk është bërë asnjë transparencë të takimeve të Bashës me Kim, kreu demokrat këtu ka bërë gabim. Ta përgatisë lidershipin, Këshillin kombëtar dhe grupin parlamentar dhe aleatët. Nëse mendon se duhet shpërfilluar, atëherë nuk ka shqetësim. Nëse mendon se duhet konsideruar duhet të kërkojë votim të fshehtë pa debat nga këshilli kombëtar dhe grupi parlamentar. Unë kam pritur që në këshillin kombëtar që u bë para ca ditësh, kam pritur që Basha të informonte këshillin kombëtar” tha ai.
Por a mendon, Mustafaj se dy zërat, Jonila Godole dhe Fitim Zekthi që dolën në javën e fundit hapur duke kërkuar distancimin nga Berisha janë testim për të provokuar debat?
“Godole dhe Zekthi janë të rinj dhe nëse i ka zgjedhur pa asnjë peshë në masën e demokratëve, atëherë ka zgjedhur njerëzit e gabuar, pasi njeriu që duhet ta testonte nëse ka një eksperiment, kjo duhej me një anëtar të vjetër të PD-së, me histori politike dhe me një farë peshe” tha ai.
Besnik Mustafaj, ish-ambasador dhe një prej miqve të ish-Kryeministrit Berisha, pati një distancim prej tij, në momentin që u largua nga kabineti qeveritar, kur mbante postin e ministrit të Jashtëm. Pavarësisht se në publik Mustafaj apo Berisha nuk kanë shkëmbyer replika apo debate, ish-ministri është shfaqur kritik, dhe iu afrua kreut të PD, Lulzim Basha, në zgjedhjet e pjesshme vendore të Dibrës. U duk sikur Mustafaj do të kishte një angazhim më të madh në ekipet e Bashës në PD, por ai thjesht mbeti një këshillues në distancë.
