Sulmuesi i talentuar i Apolonisë, Mario Gjata, kishte interesim konkret nga skuadra zvicerane Lugano, që kërkonte firmën e 21-vjeçarit. Pas disa ditësh bisedime mes klubit të Apolonisë dhe atij zviceran, akordi nuk është arritur dhe i është dhënë drita jeshile Partizanit.
Gazeta mëson se pikërisht këto bisedime me klubin e Luganos kanë shtyrë marrëveshjen mes Partizanit dhe sulmuesit 21-vjeçar.
Por tashmë, gjithçka duket drejt finalizimit dhe Mario Gjata pritet të jetë përforcimi i radhës i “demave të kuq”. Apolonia do të mbajë gjysmën e kartonit të sulmuesit në rast të ndonjë shitjeje të mundshme në të ardhmen.
Aktualisht, Gjata ndodhet në Tiranë, jo për bisedimet, por për faktin se është i grumbulluar me Kombëtaren U-21. Pas impenjimit me Kombëtaren, sulmuesi i talentuar pritet që të zyrtarizohet menjëherë me fanellën e kuqe.
Gjata do të rivalizojë me Stenio Zhuniorin për një vend titullari në majë të sulmit, por nuk përjashtohen mundësitë që Partizani të luajë me dy sulmues ose me Stenio Zhuniorin që mund të zhvendoset në të majtë të ofensivës, aty ku ka luajtur për shumicën e karrierës së tij.
