Partizani më 16 gusht u zhvendos në Ohër për të kryer fazën e dytë përgatitore, e cila kësaj radhe ishte në funksion të startit të kampionatit të 83-të të Kategorisë Superiore.
Në dallim nga faza e parë, kur “demat” u stërvitën për pjesëmarrjen në Konferencë Ligë, kësaj radhe gjërat nuk kanë shkuar si duhet për skuadrën e trajnerit Ilir Daja. Gjithçka nisi me mossigurimin e vizave hyrëse për në Maqedoni për tre futbollistë afrikanë të afruar së fundmi në ekip, Pape Sembene, Abubakar Kamara, Maguete Gueje, ku vetëm njëri ka arritur këtë javë që të bashkohet me grupin, ndërsa dy të tjerët stërviten në kryeqytet.
Pengesa e dytë për të kuqtë ishte pamundësia për të gjetur kundërshtar për ndeshje miqësore, pasi në Maqedoninë e Veriut kanë nisur aktivitetet dhe skuadrat janë të angazhuara, duke mos pasur kohë për testime. Ndaj, në fundjavën e shkuar Partizani kaloi kufirin dhe erdhi në Pogradec për të luajtur një miqësore me liqenorët. Edhe dëmtimet ishin një tjetër faktor që i prishën planet e skuadrës së Dajës në këtë periudhë përgatitore në Ohër.
Braziliani Stenio Zhunior, për shkak lëndimi, nuk ka luajtur në asnjërën nga dy testet e kësaj faze, fillimisht me Egnatian në Strugë dhe me Pogradecin. Sulmuesi kryesor ka lënë grumbullimin dhe është kthyer në kryeqytet për fazën riaftësuese.
Fati i keq ka përndjekur edhe mbrojtësin e ri, Loti Celina, i cili ka pësuar një dëmtim në kavilje. 21- vjeçari është lojtari i radhës që ka lënë fazën në Ohër dhe është kthyer në kryeqytet për të kryer ekzaminimet dhe për rikuperimin. Me grup të cunguar dhe pa kundërshtar për miqësore, Partizani do të kthehet pak para kohe nga Ohri, pasi sonte pritet që ekipi të mbërrijë në kryeqytet për të vijuar më pas me përgatitjet./Panoramasport
