Nga fillimi i muajit, nga Kabuli janë evakuar me avionë të paktën 75 mijë persona.
Lidhur me ardhjen e refugjatëve afganë në Shqipëri, Departamenti Amerikan i Shtetit iu përgjigj Deutsche Welles, se “për shkak të natyrës së komplikuar të këtyre zhvendosjeve dhe për të mbrojtur privatësinë dhe sigurinë e personave që vijnë, nuk kemi mundësi të ofrojmë informacione të tjera për kohën e mbërritjes, transportin, vendndodhjen lokale dhe destinacionin e mëtejshëm”
Presidenti Biden tha se ka udhëzuar Departamentin e Shtetit dhe Pentagonin të përgatitin plane rezervë nëse situata u del nga parashikimet, dhe nëse Talibani do i bllokonte rrugët e evakuimit për afganët dhe të huajt.
Çdo ditë tjetër në Kabul e rrit rrezikun për trupat amerikane, theksoi Biden. Ai iu referua shprehimisht rrezikut të një sulmi nga dega lokale e milicisë terroriste, “Shteti Islamik”, që është e armiqësuar edhe me talibanët.
Ushtria amerikane ka ende 5800 ushtarë për evakuimet nga Kabuli.
Ndërkohë Banka Botërore pezulloi sot projektet zhvillimore në Afganistan prej shqetësimeve mbi drejtimin e vendit dhe të ardhmen e grave afgane.
