Autoritetet shëndetësore në Kosovë kanë regjistruar të Shtunën 8 viktima me koronavirus. Në 24 orët e fundit, janë regjistruar edhe 2,279 raste të infektimit, pas 12,666 testimeve.
Ministria e Shëndetësisë ka njoftuar se më 21 gusht janë shëruar 325 pacientë nga COVID-19, derisa raste aktive janë 18,287. Prej 13 marsit 2020, kur janë regjistruar rastet e para të infektimit, autoritetet shëndetësore në Kosovë kanë regjistruar mbi 125,000 pacientë me këtë virus. Prej tyre mbi 2,300 kanë vdekur.
Në 24 orët e fundit, janë vaksinuar 22,486 persona me Pfizer/BioNTech ose AstraZeenca. Të vaksinuar me të dyja dozat janë 234,731 persona, ndërsa sipas autoriteteve 687,553 vaksina janë dhënë në total në Kosovë.
Shërbimi Spitalor Klinik Universitar i Kosovës (SHSKUK), njoftoi se në spitale e përgjithshme në Kosovë, si dhe në klinikat për trajtim të koronavirusit, janë të shtruar 757 pacientë, prej tyre 653 me koronavirus. Sipas SHSKUK-së, 26 pacientë janë në gjendje të rëndë dhe 610 po trajtohen me oksigjenorapi.
Nga 20 gushti, në Kosovë kanë nisur së zbatuari masat e reja për luftim të pandemisë. Ahengjet dhe dasmat janë anuluar, është zvogëluar orari i bizneseve të gastronomisë, si dhe është shtuar kërkesa për dëshmi të vaksinimit për të fituar qasje në një mori aktivitetesh.
