Ka luftuar, ka vuajtur dhe në fund ka fituar. Napoli është kthyer tri pikë larg Juventus në kampionatin italian falë fitores 3-1 të marrë kundër Genoa-s në shtëpi.
Ose më saktë falë Gonzalo Higuain, i cili ka realizuar një dygolësh, duke përmirësuar rekordin personal të golave të realizuar në karrierë gjatë një sezoni. Argjentinasi është aktualisht në kuotën e 29 realizimeve në Serinë A (31 në të gjitha kompeticionet).
Siç e tregon edhe rezultati, nuk ka qenë një fitore aspak e lehtë për “axurrët”, të cilët kanë kaluar në disavantazh pas vetëm 10 minutash lojë. Ka qenë Rincon që ka befasuar vendasit në minutat e para të sfidës, duke realizuar për skuadrën e Genoa-s, që vinte prej dy fitoresh radhazi në kampionatin italian të futbollit. Napoli është kundërpërgjigjur në minutën e 51-të kur Gonzalo Higuain ka shënuar pas një asisti të saktë nga ana e shqiptarit Elseid Hysaj, i cili po zhvillon një sezon të jashtëzakonshëm në radhët e Napoli-t.
Goli i përmbysjes dhe i fitores që mban ekipin e Sarri-t akoma në luftë për titullin ka ardhur nëntë minuta para fundit dhe autori ka qenë përsëri ai, “El Pipita”, me Hamsik që ka luajtur rolin e “asist man”. Në minutat shtesë El Kaddouri, i futur në lojë në vend të Huiguain, ka fiksuar shifrat në 3-1. Tifozët e Napoli mund të vazhdojnë të ëndërrojnë. Napoli – Genoa Live Score
Napoli-Genoa 3-1
Shënues: Higuain 51’, 81’, El Kaddouri 92’/Rincon 10’
Napoli: Reina, Hysaj, Albiol, Koulibaly, Ghoulam, Allan, Jorginho, Hamsik, Callejon (Mertens 59’), Higuain (El Kaddouri 89’), Insigne (Gabbiadini 74’). Trajner: Sarri.
Genoa: Perin, Izzo, Burdisso, De Maio, Rigoni (Tachtsidis 65’), Dzemaili, Gabriel Silva, Rincon, Laxalt, Pavoletti (Cerci 58’), Pandev. Trajner: Gasperini.
Gjyqtar: Gervasoni
Kartonë të verdhë: Koulibaly, Jorginho, Insigne, Dzemaili/Fiamozzi
