Vendimin e qeverisë për kalimin e truallit ku ishte ndërtuar Teatrit Kombëtar te Bashkia e Tiranës, deputetja e zgjedhur e PD Albana Vokshi, e cilëson një akt tjetër poshtërues për qytetarët dhe Gjykatën Kushtetuese.
“Vendimi i pak javëve më parë nga Gjykata Kushtetuese thotë qartë se vendimi i qeverisë i një viti më parë për të kaluar Teatrin në pronësi të Bashkisë së Tiranës ishte antikushtetues, në dëm të trashëgimisë kulturore kombëtare. Vendimi do të thotë se Edi Rama nuk pyet për institucionet e reja të drejtësisë, kur vendimet e tyre pengojnë planet e tij korruptive me tokën e Teatrit Kombëtar”, shprehet Vokshi.
Në një postim në FB, ajo shton se, PD e ka thënë që prej ditës së parë se Edi Ramës nuk i intereson një Teatër i ri Kombëtar, por vetëm trualli i tij, të cilin sipas saj, e sheh si burim për të përfituar para dhe pasuri të paligjshme.
“Kalimi ne pronësinë e Bashkisë së Tiranës i truallit të Teatrit Kombëtar është pasojë e tjetërsimit të votës së qytetarëve. Një kryeministër si Edi Rama, pushteti i të cilit buron nga masakra elektorale e 25 prillit, ka për të marrë gjithmonë vendime kundër interesit të qytetarëve. Në vend të një kryeministri, vendi do të sundohet nga një politikan që del mbi gjykatat dhe mbi ligjin”, vijon Vokshi.
Një apel e ka edhe për SPAK.
“Është koha që SPAK të mos provohet si vegël në duart e sundimtarit Rama. Është koha që Edi Rama dhe Erion Veliaj të dalin para drejtësisë dhe të ndalohet masakra tjetër me tokën e Teatrit Kombëtar”, përfundon ajo.
Foto të postuara nga Vokshi
