Një stuhi e papritur e ka përfshirë për pak minuta kryeqytetin. Ndonëse temperaturat gjatë ditës së sotme shkuan deri në 36 gradë Celsius, një erë e vrullshme me shi përfshiu qytetin e Prishtinës.
Stuhia zgjati për 2-3 minuta dhe nuk raportohet të ketë shkaktuar ndonjë dëm të konsiderueshëm. Sipas parashikimit të meteorologëve, për sot nuk ishte parashikuar ndonjë stuhi, përveç ndonjë rige dhe ere të lehtë.
Instituti Hidrometeorologjik i Kosovës ka njoftuar se masat e nxehta të ajrit të ardhura nga Afrika Veriore (Shkretëtira e Çadit dhe Nigerisë), do të mbeten të qëndrueshme edhe për ditët vijuese, duke krijuar mot shumë të nxehtë dhe me vapë.
Nëpër disa zona u parashikuan vranësira, kryesisht rreth relievit malor, ku u parapa edhe ndonjë rigë e dobët. Temperaturat minimale do të lëviznin ndërmjet 16-18 gradë Celsius, ndërsa maksimalet e ditës ndërmjet 35-38 gradë Celsius.
“Indeksi UV mbetet në vlera ekstreme, prandaj kujdes nga kontakti direkt me rrezet e diellit, sidomos personat në moshë dhe shtresa tjetër e popullatës me sëmundje kronike. Do të fryjë erë e lehtë deri mesatare nga drejtimi i juglindjes dhe verilindjes”, njoftoi IHMK.
