Partizani nuk e ka mbyllur ende merkato. Pas ndeshjes me Bazelin drejtuesit e kuq pritet të afrojnë futbollistë të tjerë në skuadër për të plotësuar organikën e Dajës që siç është parë në këto ndeshje të Conference League është shumë e vakët.
Të kuqtë kanë kthyer sytë sërish nga tregu vendas dhe kanë piketuar dy talentët e Apolonisë, Redon Mihana dhe Mario Gjata. Që të dy lojtarët shkëlqyen sezonin e kaluar në Superligë dhe ofertat nuk kanë munguar si nga jashtë, por edhe nga ekipet vendase. Partizani ka nisur nga puna për të bindur Apoloninë që të marri që të dy lojtarët edhe pse kanë konkurencë të madhe me Dinamon dhe Tiranën.
Pas Sotës, Daja dëshiron në ekip Mihanën dhe Gjatë për të përforcuar repartin e sulmit. Ngelet për t’u parë në ditët në vijim nëse të kuqtë do të bëjnë një ofertë të kënaqshme për Apoloninë që të lëshojë “dy xhevahirët” e saj pasi presin shumë nga shitja e tyre.
