Nënkryetari i LSI, Petrit Vasili, ka reaguar përmes një postimi në rrjetet sociale, lidhur me raportin përfundimtar të OSBE/ODIHR lidhur me zgjedhjet e 25 prillit.
Vasili tha se ky raport i vë vulën masakrës zgjedhore të 25 prillit të shkaktuar nga Qeveria. “Raporti final vulos faktin se ne 25 prill nuk pati zgjedhje, por nje masaker zgjedhore ku qeveria:
1.Bëri shitblerjen me kriminale të votave të parë ndonjëherë.
2. Përdori pushtetin duke shpërdoruar në mënyre kriminale të dhënat personale të qindra mijra qytetarëve, të cilat janë tashmë në duart e krimit të organizuar dhe trafikantëve duke tronditur rëndë sigurinë publike dhe atë personale të qytetarëve.
3.Shpërdoroi pushtetin dhe administratën për presione mafioze mbi qytetarë dhe biznese, përdori dhjetra milion euro dhe e gjithë administrata u përdor si detashment kriminal zgjedhor kundër qytetarëve.
4.Media u zaptua kriminalisht nga qeveria për të mashtruar dhe dezinformuar qytetarët për qëllimet elektorale të rilindjes”, shkruan Vasili.
Duke iu referuar raportit përfundimtar, ku thuhet se “praktikat gjerësisht të përhapura të shitblerjes së votave vazhduan të përbënin problem. Rrjedhja e të dhënave personale sensitive, duke përfshirë edhe preferencat politike të zgjedhësve përbën shqetësim serioz dhe i bën zgjedhësit vulnerabël” dhe “partia qeverisëse mori avantazhe të konsiderueshme nga të qenit në pushtet, duke përfshirë përmes kontrollit të administratës lokale dhe nga shpërdorimi i burimeve të administratës publike”, Vasili tha se tashmë zgjedhjet e 25 prillit kanë rënë.
“Në pushtet janë banditët rilindas që grabitën në mënyrë mafioze votat.
Ndaj beteja për zgjedhje të lira dhe të ndershme është dhe mbetet një betejë e shenjtë dhe pa asnjë kompromis për të shpëtuar të tashmen dhe të ardhmen e Shqipërisë nga rrënimi rilindas”, shkruan Vasili.
