Të paktën 10 persona humbën jetën si pasojë e një aksidenti që ka ndodhur sot rreth orës 06:00, në Slovenski Brod, në Kroaci, raportojnë mediat, por edhe autoritetet kroate.
Si pasojë e këtij aksidenti janë lënduar rreth 45 persona, që ndodheshin në bordin e autobusit, i cili pasi doli nga rruga u përmbys.
Bëhet e ditur nga mediat kroate se dhjetë nga personat e lënduar janë në gjendje të rëndë shëndetësore.
Nga raportimet, autobusi ishte nisur nga Frankfurti, kishte si destinacion Kosovën, ndërsa në të udhëtonin 60 persona.
Deri te aksidenti dyshohet se ka ardhur pasi që shoferin e autobusit e ka zënë gjumi, derisa ishte duke vozitur.
Policia kroate po heton mbi aksidentin, i cili vlerësohet si një ndër më tragjikët të ndodhur në këtë shtet.
