Nënkryetari i LSI-së, Petrit Vasili, ka reaguar përmes një postimi në rrjetet sociale, lidhur me situatën e pandemisë së Covid-19, ndërsa akuzon Qeverinë se ka zëvendësuar mendimin shkencor me sharlatanizëm politik.
Vasili shkruan se profesionistët stigmatizohen dhe ofendohen nga vetë kryeministri kur nuk mbështesin budalleqet e tij, duke shtuar se debati mes profesionistëve ka vdekur.
“Shkencetarët i kanë klasifikuar në mënyrë mesjetare në se janë pro apo kundër rilindjes.
Masat merren sipas oreksit psiqik dhe politik të kryeministrit ndaj kanë qenë paradoksale, jo efikase dhe me qëllim të vetëm fshehjen e realitetit dhe të vertetës.
Asnjë debat për vaksinat dhe llojet e tyre, asnjë debat për llojet e mbylljes, asnjë debat për azhurnimin e protokolleve mjeksore bazuar në evidencë, asnjë debat për imunitetin e tufës, asnjë debat për strategjinë lidhur me çfaqjen e variantit Delta.
Eshtë një kurajo vrastare të bazohesh mbi një Komitet Politik Ekspertësh të mbyllur, të paditur dhe me një peshë shkencore të papërfillshme, që funksionon jo sipas një axhende mjeksore skrupuloze dhe të qartë, por është thjesht një apediks i axhendës propagandistike të kryeministrit”, shkruan Vasili në rrjetet sociale.
Sipas tij, faturën e antishkencës për fat të keq e paguajnë shqiptarët jo vetëm me vdekje, por edhe me pasojat afatgjata shendetësore postCovid.
“Pandemia deri tani ka treguar realisht pasoja katastrofike në çdo plan duke filluar nga ai shendetësor e deri tek ai social ekonomik.
Shqiptarët nuk janë skllevër shendetësore të qeverisë së rilindjes dhe të Ramës.
Shqiptarët meritojnë shumë më shumë pasi jetojnë në një kontinent ku nivelet shkencore janë nga më të lartat e globit dhe ku mund të përfitojmë prej tyre shumë.
Shqipëria ka mjaft profesionistë shumë të aftë dhe të edukuar brenda e jashtë vendit që me objektivitetin e dijeve të tyre të formësojnë një qëndrim rrenjësisht të ri.
Ndaj duhet të ndryshojë rrenjësisht administrimi shkencor i Pandemisë së Covid në Shqipëri sepse beteja nuk ka mbaruar dhe fatura e antishkencës rilindase mund të jetë shumë e rëndë edhe në muajt që vijnë”, apelon Vasili.
