Partia Demokratike ka mbledhur ditën e sotme Kuvendin Kombëtar të saj për të riformatuar edhe një herë anëtarët e këshillit të saj.
Edvin Kulluri, pjesë e grupit “Për PD” ku bëjnë pjesë edhe Bujar Nishani dhe Edith Harxhi, u shpreh për Ora News, se kreu demokrat Lulzim Basha shihet si shkaktari kryesor i krizës në PD.
“Basha tha sot se nuk do ta kthejë faqen tjetër. Zoti Basha është i lirë ta kthejë ose jo faqen tjetër, sepse ne nuk e shohim atë fare si zgjidhje për daljen e PD-së nga kriza, madje e shohim si shkaktarin kryesor. Për këtë arsye komunikimi ynë ka qenë me demokratët dhe me opinionin publik.
Ne nuk i kemi kërkuar zotit Basha të ndryshojë sepse i bie të bënim gabimisht ët njëjtën gjë që bën ai me zotin Rama që i kërkon të reflektojë përderisa nuk e mund dot. Ne në 13 qershor kemi hyrë në një garë për ta mundur, fatkeqësisht ishte një garë e pabarabartë. Së pari kishte vetëm 13 ditë kohë për të bërë fushatë, së dyti gjithë makineria e partisë ishin rreshtuar hapur me zotin Basha duke ushtruar presion ndaj anëtarëve. Kjo është e njëjta gjë që ka bërë Rama me qytetarët sipas pretendimit të Bashës”, tha Kulluri.
Ai u shpreh se ka 8 vite që nuk ka rrotacion politik dhe nëse shkohet me këtë opozitë në zgjedhjet e ardhshme, sipas tij nuk do të ketë sërish ndryshim.
“Debati me zotin Basha është i kotë dhe ne nuk kemi debat. Nëse ne duam të justifikojmë zotin Basha mund ta bëjmë pa fund, por nuk zgjidhim problemin që kemi në Shqipëri. Ka 8 vite që nuk ka rrotacion dhe me sa duket as për 12 nuk do ketë nëse do shkojmë me këtë opozitë në zgjedhjet e ardhshme. Ne sot kemi njerëz të emëruar në parti që nuk kanë asnjë lloj CV, të cilët mund të jenë shumë të vlefshëm në administratën publike nesër, pro nuk janë politikanë. Aty qëndrojnë ata që i shërbejnë Lulzim Bashës qorrazi dhe largohen ata që kanë njëfarë mendimi. Dëmi që i bën Lulzim Basha nuk është vetëm dëm që i bën PD-së, i bën kërkesës së vazhdueshme të qytetarëve për të larguar këtë qeveri dhe për të sjellë një qeveri më të mirë”, tha ai.
