Dy mina me telekomandë janë sekuestruar nga policia e Durrësit, ndërsa një i ri është vënë në pranga. Minat dyshohet se do shiteshin 6000 €.
Burime zyrtare bënë me dije këtë të Shtunë se shërbimet e Komisariatit të Policisë Durrës, në koordinim me strukturat hetimore të DVP Durrës, në bazë të informacioneve të siguruara në rrugë operative se një shtetas me tendencë kriminale në fushën e prodhimit dhe shitjes së minave me telekomandë po tentonte të shiste mina me telekomandë, kanë organizuar punën dhe në bashkëpunim me patrullat e përgjithshme kanë finalizuar operacionin e koduar “Parandalimi”.
Në kuadër të këtij operacioni, në vendin e quajtur “Muzeu”, në lagjen nr.9, Durrës, u bë kapja dhe arrestimi në flagrancë i shtetasit shtetasi Eluar Thaçi, 30 vjeç, banues në Katund i Ri-Durrës.
Shërbimet e Policisë, gjatë kontrollit fizik, i gjetën dhe sekuestruan në cilësinë e provës materiale 2 mina me telekomandë të lidhura me aparat celular.
Minat, sipas policisë, i riu do i shiste kundrejt shumës monetare 6000 euro.
“Në bashkëpunim me Prokurorinë e Rrethit Gjyqësor Durrës, vijon puna për identifikimin dhe kapjen e personave të tjerë të përfshirë në këtë veprimtari kriminale”, shtuan të njëjtat burime.
Ndaj 30-vjeçarit rëndon akuza “Mbajtja pa leje dhe prodhimi i armëve, armëve shpërthyese dhe municionit”.
