Komisioni Evropian ka reaguar ditën e sotme pas padisë që Aleanca për Mbrojtjen e Teatrit Kombëtar bëri në SPAK ndaj ambasadorit të BE në Tiranë, Luigi Soreca.
“Duket se ka një fushatë të drejtuar kundër delegacionit të BE në Shqipëri, dhe më duhet të them se akuzat janë të pabazuara.
Liderët e BE kanë besim tek ambasadori Soreca dhe punën që ai po bën në Shqipëri”, thuhet në deklaratë.
Zëdhënësi i KE, në një deklaratë nga Brukseli, i cilëson të pabaza akuzat e ngritura ndaj ambasadorit Soreca, duke thënë se ka një fushatë të drejtuar kundër delegacionit të BE në Shqipëri.
“Duket se ka një fushatë të drejtuar kundër delegacionit të BE në Shqipëri, dhe më duhet të them se akuzat janë të pabazuara dhe dezinformuese. Liderët e BE kanë besim tek ambasadori Soreca dhe punën që ai po bën në Shqipëri. Soreca po bën punë të mirë në interes të BE, por edhe në interes të shqiptarëve, punë të mirë edhe në interes të marrëdhënieve Shqipëri-BE. Ne vazhdojmë të mbështesim fort reformën në drejtësi në Shqipëri. I bëjmë thirrje aktorëve shtetërorë dhe joshtetërorë në Shqipëri të vijojnë zbatimin e reformës në përpjekjet e mëdha të Shqipërisë për të ndjekur reformën në drejtësi dhe Vettingun në gjyqësor, që po japin rezultatet e para të prekshme dhe nuk mund të ngadalësohen”, deklaron zëdhënësi i KE.
Grupimi “Aleanca për Mbrojtjen e Teatrit” ka kallëzuar në SPAK ambasadorin e BE-së në vendin tonë, Luigi Soreca dhe kryebashkiakun e Tiranës Erion Veliaj.
Në padinë e “Aleancës” me 22 firma kallëzuesish, kërkohet fillimi i ndjekjes penale për personat e kallëzuar, Luigi Soreca dhe Erion Veliaj. Ata akuzohen për kryerjen e veprave penale “Korrupsioni aktiv i nëpunësve të huaj publikë”, “Korrupsioni aktiv i funksionarëve të lartë shtetërorë ose të zgjedhurve vendorë”, “Ushtrimi i ndikimit të paligjshëm ndaj personave që ushtrojnë funksione publike”, “Shpërdorimi i detyrës” , “Korrupsioni pasiv i personave qe ushtrojnë funksione publike” “Korrupsioni pasiv i nëpunësve të huaj publikë”, “Korrupsioni pasiv i funksionarëve të lartë shtetërorë ose i te zgjedhurve vendorë” kryer në bashkëpunim.
Sipas aleancës, Soreca dhe Veliaj kanë tentuar të ndikojnë në vendimin e Gjykatës Kushtetuese lidhur me ccështjen e Teatrit Kombëtar, përtë cilën GJK u shpreh disa ditë më parë.
Në kallëzim, aleanca sjell në vëmendje vizitën jozyrtare të ambasadorit të BE në Gjykatën Kushtetuese, ditën e vendimit. Pretendohet se Soreca ka lobuar për një vendim në favor të Bashkisë së Tiranës të drejtuar nga Erion Veliaj.
