Vokli Laroshi është goditja e radhës e Partizanit. Portieri i Turbinës së Cërrikut, ishte një nga emrat më të lakuar të kësaj merkatoje vere, teksa ka zgjedhur t’i bashkohet “Demave të Kuq”, duke shpresuar të ecë në gjurmët e Alban Hoxha.
“Panorama Sport”, mëson se 19-vjeçari pritet të prezantohet nesër. Kapitenin e Turbinës e donte edhe Tirana, për në fund ai duket se ka zgjedhur “Demat”.
Laroshi gjithashtu është pjesë e Kombëtares Shpresa, teksa kontrata me klubin e Kategorisë së Parë, i skadoi në fund të sezonit.
Paraqitjet e mira që ai ka bërë edicionin e fundit me cërrikasit dhe për më tepër që është edhe kontingjent i kuqezinjve të drejtuar nga Alban Bushi, bindën drejtuesit e Partizanit, për ta afruar në skuadër.
19- vjeçari ka milituar për dy sezone në radhët e ekipit të vendlindjes së tij, duke qenë një titullar i padiskutueshëm, edhe pse në një moshë mjaft të re. Pas 36 ndeshjeve me këtë fanellë, gardiani do të nisë një tjetër aventurë kësaj here më një klub të madh si Partizani.
