Nga Boldnews.al
U lajmërua konferencë. Shumë prisnin që ministri të shkundte veten dhe vartësit e tij për nëntë vdekje në dy ditë. Një familje me katër anëtarë e shuar në aksident e pa kaluar pak orë nga kjo ngjarje, katër të vrarë për shfrytëzimin e hapësirave të plazhit në Velipojë. Me një bilanc të tillë minimalisht ministri do duhet të shkundte veten dhe mbi të gjithë kreun e policisë së shtetit, por doli për të kundërtën; të mbronte Ardi Veliun e Ramës.
“Policia e Shtetit përtej të metave e dobësive të saj e përtej përmirësimeve që duhet e do të bëhen, as nuk ndjek cdo makinë që lëviz në rrugët e vendit e as nuk mund të parandalojë një sherr në 1 të natës midis dy fqinjve”, u shpreh Çuçi në konferencën për mediat.
Mbrojtje më të mirë se kaq Çuçi nuk mund t’i bënte “nokut të Ramës”, Drejtorit të Policisë së Shtetit Ardi Veliu. Kush mban përgjegjësi në këtë vend? Policia jo, ministri jo, kryeministri jo dhe jo! Madje, me një indiferentizëm të theksuar, Çuçi e konsideroi si një ngjarje normale, sepse për të vrasje dhe aksidente ka pasur dhe do të ketë. Po sot nuk bëhet fjalë vetëm për bilancin, që të vret sa përmendet shifra nëntë viktima, por për problemin e vërtetë që lidhet me pandëshkueshmërinë dhe dhënien krah të elementëve të krimit nga vetë strukturat policore dhe politike.
Kryepolici i vendit Ardi Veliu u emërua në marsin e vitit 2018 në atë detyrë, pas një konsumimi “bashkëjetese profesionale” me ish-ministrin e Brendshëm Fatmir Xhafaj. Ai gëzon edhe mbështetjen e Ramës dhe kjo nuk është pak, pasi shpesh Veliu i bënte karshillëjk edhe ish-ministrit Sandër Lleshaj.
Kanë ikur katër jetë nga plumbat dhe pesë të tjerë nga aksidentet të ardhura nga “djemtë e baballarëve biznesmenë”, që u japin në duar fëmijëve një “armë” të frikshme që quhet makinë e viteve të fundit për të ecur çmendurisht në duart e tyre. Është vrarë një 20-vjeçar i pafajshëm në ditën e parë të punës së tij si kamarier në hotelin ku u bënë kapic katër viktima. As ligj, por as moral nuk po ka…!
Çuçi e di mirë se çfarë është “morali politik”, por vetëm si koncept që e ka lexuar diku, por që nuk është në gjende ta zbatojë për veten. “Unë nuk mund të kem përgjegjësi morale për një gjë që është e zakonshme, jo në kuptimin negativ të fjalës, pra për të bërë zakon këtë gjë, por e zakonshme për të ndodhur një gjë, pavarësisht nga ne. Nuk ndjej ndonjë përgjegjësi. Unë do të ndihesha mirë që si ministër të ulja numrin e vdekjeve”-tha Çuçi.
Ai sot gati sa nuk ulëriti se “jam ministër kot, mos më bini në qafë, mos më kërkoni të propozoj shkarkimin e Veliut, sepse të gjitha i kontrollon Rama”. Po në fakt Çuçi mund të jetë kot dhe me gjasë faktet treguan se ishte i tillë, pasi edhe kur Rama e emëroi Ministër të Brendshëm ai nuk dinte gjë, pasi ishte në aktivitet në Lushnje, duke “inspektuar” serat me kastraveca.
Çuçi është aq i zgjuar për të kuptuar sesi bëhet karrierë politike, ai ndoshta më shumë se kushdo e njeh më mirë Ramën, në çdo “raport” dhe tekë, pasi gjithçka i pëshpërihet në vesh për “karakterin e tij”… Ndaj sot Çuçit i duhet dhënë meritë, është i kapshëm spese për të vijuar karrierën në politike i bindet aq shumë Ramës sa nuk e pati problem të bëhej “velinë” për të mbrojtur Veliun e Ramës.
