Teka këtë të Mërkurë mbeten për tu luajtur ndeshjet e fundit në grupe të EURO 2020, disa ekipe kanë nisur ndoshta të bëjë llogaritë lidhur me kundërshtarët e ardhshëm.
Në një artikull të publikuar, prestigjiozja sportive gjermane “sport1.de”, teksa arsyeton këtë qasje për kombëtaren e Gjermanisë, shkruan se “Panzerave” u leverdis më shumë një vend i dytë në grup “në planin afatgjatë”, sesa i pari.
Arritja e piedestalit në grupin F, për median gjermane, do të sjellë përballë kundërshtarë më të fortë në fazën me eliminime për kombëtaren, sesa pozicionimi në vndin e dytë.
“Sport1.de” shkruan se nëse del e para, Gjermania ka një short të lehtë në raundin e 16-ave, por në rast kualifikimi, më tej do të përballet me kundërshtarë si Italia apo Belgjika.
“Italianët kanë qenë të pamposhtur në 30 ndeshje dhe nuk kanë pësuar gol në 11 ndeshje. Belgët gjithashtu konsiderohen një nga favoritët kryesorë për titullin pas një performance të fortë në grupe”, raporton sportivja gjermane.
Nga ana tjetër, nëse e mbyllin të dytët në grup, do të përballen me siguri me Anglinë në fazën e 16-ave. Por, për sportiven gjermane, “Tre Luanët” ishin në gjendje të bindnin vetëm në një farë mase në fazën e grupeve dhe janë një nga kundërshtarët e preferuar të gjermanëve në turne të mëdha. Një gjysmëfinale e mundshme do të ishte një duel me Holandën, por sipas “sport1.de” “portokallinjtë” nuk janë treguar bindës dhe nuk janë ndër favoritët kryesorë për titullin.
/BoldNews.al/
