Është një Joachim Low tepër i kënaqur ai që u shfaq para kamerave pas fitores brilante ndaj Portugalisë në “Allianz Arena”. Trajneri i panzerave pohoi se skuadra bëri ndeshje shumë të mirë pothuajse në çdo aspekt.
“Ishte një performancë e shkëlqyer. Kishim kombinime të mira dhe një lojë të mirë në pozicionet nga krahët. Ky ishte plani ynë për këtë ndeshje. Unë e prisja që ekipi do të përmirësohej në sulm dhe të bënte një reagim të tillë”.
Trajneri gjerman u shpreh se asgjë nuk kanë arritur lojtarët dhe se Europiani nis tani për ta.
“Ky ishte qëllimi, të fitonim e të vazhdojmë përpara në këtë turne. Por tani nis për ne Europiani, asgjë e madhe nuk ka ndodhur. Ne fituam ndeshje dhe tani vijnë detyrat e tjera që kemi përpara. Mendoj se kemi qenë në kërkim të ekuilibrit dhe pas ndeshjes me Francën ndryshuam marsh. Kundërshtari ishte i fortë dhe paraqitja jonë ishte shumë e mirë”, përfundoi trajneri i përfaqësueses gjermane, Joachim Low.
