Sa i takon 300 kg lëndë narkotike që u kapën pasditen e sotme, burime bëjnë me dije se kamioni kishte mbërritur në portin e Durrësit mbrëmjen e djeshme, ndërsa gjatë kontrollit me skaner në Qafë-Thanë ka rezultuar i pastër. Janë ngritur dyshimet se është mbushur në Shqipëri.
Plot 300 kilogramë lëndë e dyshuar kokainë u kapën në Portin e Durrësit nga Task Forca e Portit. Italia ishte destinacioni final i kamionit që drejtohej nga një shtetas nga Maqedonia e Veriut.
Shoferi është identifikuar si Nazif Ajroski, 40 vjeç dhe ka mohuar të ketë dijeni mbi ngarkesën e paligjshme.
“Si rezultat i kontrolleve të shtuara me qëllim parandalimin, evidentimin dhe goditjen e trafikimit të lëndëve narkotike, bazuar edhe në analizën e riskut të bërë nga Task Forca permanente e përbërë nga Policia Kufitare e Portit të Durrësit, Policia Kriminale e Drejtorisë Vendore të Policisë Durrës dhe nga autoritetet doganore të Portit, e cila vepron në Portin e Durrësi, në bazë të dyshimeve të krijuara nga kjo Task Forcë kanë kaluar për kontroll të detajuar në vijën e dytë në dalje një kamion transit me targa të Maqedonisë së Veriut.
Si rezultat i kontrollit të imtësishëm të ushtruar në kamionin që drejtohej nga një shtetas nga Maqedonia e Veriut, Task Forca gjeti të fshehur në trupin e kamionit, një sasi rreth 300 kilogramë lëndë narkotike të dyshuar kokainë, e cila u sekuestrua në cilësinë e provës materiale”, njofton policia.
Ndërsa grupi hetimor, nën drejtimin e Prokurorisë së Rrethit Gjyqësor Durrës vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të tjerë të përfshirë në të.
