Interesat sjellin 75% të të ardhurave të bankave, normalizohen në nivelet e para pandemisë

75% e të ardhurave të sektorit bankar këtë vit vijnë nga interesat.

Të dhënat e Bankës së Shqipërisë tregojnë se ky tregues ka rënë krahasuar me një vit më parë, kur sistemi u prek nga pasojat e pandemisë dhe mbylljes së ekonomisë, çka tregon një rikthim në normalitet.

Vitin e kaluar, sidomos gjatë periudhës së mbylljes së ekonomisë, të ardhurat nga interesat e rritën ndjeshëm peshën e tyre në strukturën e të ardhurave totale të sektorit bankar. Në periudhën mars-prill 2020 ky tregues ishte sipër nivelit të 80%, ndërsa edhe për majin qëndroi shumë afër këtij pragu. Rritja e peshës së interesave në strukturën e të ardhurave erdhi për shkak të rënies drastike të të ardhurave nga burimet e tjera dhe sidomos nga komisionet, si pasojë direkte e kufizimeve dhe e krizës. Por, me kalimin e muajve, ky tregues pësoi një rënie graduale, në nivelet normale të periudhës para pandemisë.

Sipas Bankës së Shqipërisë, për tremujorin e parë 2021 bankat përfituan 3.4 miliardë lekë të ardhura jo nga interesat, në rritje me 65% krahasuar me të njëjtën periudhë të vitit të kaluar. Në pjesën më të madhe, të ardhurat brenda këtij zëri vijnë nga komisionet, tarifat apo penalitetet.

LEXO EDHE  KLSH gjen shkelje në tenderat e Bashkisë së Tiranës dhe i rekomandon APP gjoba, ndëshkohen 25 zyrtarë

Sidoqoftë, interesat ngelen burimi kryesor për bankat tregtare në Shqipëri dhe përbëjnë rreth tre të katërtat e të ardhurave totale. Të ardhurat nga interesat vijnë nga huadhënia dhe nga investimit në letra me vlerë. Megjithatë, në vitet e fundit bankat po tentojnë të diversifikojnë burimin e të ardhurave. Pesha e tarifave, komisioneve dhe të ardhurave nga këmbimi valutor është rritje. Gjithashtu, shumë banka po shtojnë edhe gamën e shërbimeve të ofruara në licencat e tyre, duke përfshirë edhe shërbimet e depozitarit për fondet e pensionit dhe investimit apo shërbimet komisionere për investimin në letra me vlerë.

Një tjetër tregues që shënoi rritje të ndjeshme në valën e parë të pandemisë ishte raporti mes shpenzimeve jo për interesa dhe të ardhurave bruto të sektorit bankar. Në periudhën mes marsit dhe qershorit ky tregues u rrit sipër nivelit të 60%, ndërsa në vijim ka pësuar një rënie të lehtë të lehtë dhe në fund të prillit ishte në nivelin e 58.4%. Rritja e këtij treguesi erdhi njëkohësisht nga tkurrja e përkohshme e bazës së të ardhurave të sektorit bankar, por edhe nga rritja e ndjeshme e shpenzimeve të bankave, të lidhura me protokollet shëndetësore për të frenuar përhapjen e pandemisë. /Monitor/