Kërkohej ne Pogradec për trafik te klandestinëve sirianë, arrestohet në Tiranë. Juxhin Hamajezi përfundoi në komisariatin numër 4 te kryeqytetit, mesnatën e kaluar, ndërsa policia i gjeti dhe një pasaportë franceze cila dyshohet të jetë false.
Në 2018-ën i riu i shpëtoi një atentati me armë zjarri në zonën e Kinostudios.
Juxhin Hamajezi, një person me precedent penal u arrestua mesnatën e së martës në Tiranë për trafik klandestinësh sirianë.
Në momentin e arrestimit Hamajezi nuk ka bërë rezistencë, ndërsa i është sekuestruar një pasaportë franceze, e dyshuar si e falsifikuar.
Në dokument i arrestuari mban të dhënat e tij personale, ndërsa tashmë ka nisur verifikimi për autenticitetin.
Ora News mëson se pas shoqërimit në ambientet e komisariatit 4 në Tiranë, ai është marrë nga një patrullë e policisë së Pogradecit, për shkak se i riu është përfshirë në një ngjarje kriminale në këtë qytet.
Burimet i thanë Ora News se policia dhe prokuroria e Pogradecit e kishin shpallur në kërkim Juxhin Hamajezin, pasi kalonte shtetas sirianë nga Greqia në Shqipëri dhe jashtë kufijve të vendit.
Në një rast është pikasur nga strukturat policore të Pogradecit, por nuk i është bindur urdhrit për të ndaluar.
Disa kilometra më tej ai ka zbritur sirianët dhe është larguar, duke mos u arrestuar nga policia që i ishte vënë në ndjekje.
Në 2018, Juxhin Hajamezi, i ka shpëtuar një atentati me armë në zonën e ish-Kinostudios.
Ai mbeti i plagosur bashkë me të vëllanë Rivelino Hamajezi.
Për këtë ngjarje u hetua në dy pista, atë të prishjes së pazareve të drogës dhe një plagosje te mëparshme që mund të ketë kryer ky i fundit. /Oranews/
