Rikthimi i Dinamos në Kategorinë Superiore ishte një nga lajmet më të bukura për futbollin shqiptar. Pas shumë vitesh, 18 herë kampionët e vendit u ngjitën sërish mes më të mirëve. Projekti te “Nëndetësja Blu” është mjaft ambicioz ku tashmë dhe financat duket se nuk mungojnë më. Drejtuesit po punojnë intensivisht në merkato e paralelisht për të sistemuar skuadrën me plotësimin e organikës.
Ambientet për t’u stërvitur janë ato që kanë shqetësuar më shumë kryeqytetasit. Megjithatë burime të besueshme bëjnë me dije për Neësport.al që skuadra e Dinamos do të përgatitet në periferi të Tiranës, te kompleksi “Football Republic”. Duket se në periferi të kryeqytetit do të ketë një tjetër derbi, duke qenë se po në të njëjtin vend stërvitet dhe Partizani.
Gjithashtu drejtuesit kanë gjetur dhe shtëpinë për lojtarët, të cilët do të qëndrojnë gjithmonë të grumbulluar te hotel “Eklips”. Një pjesë e mirë e tij është prenotuar për një sezon nga drejtuesit kryeqytetas. E pikërisht afërsia me kompleksin e Redi Jupit, ka bërë që drejtuesit t’i besojnë fushave të “Football Republic”.
