Drejtuesi u autobusit nga i cili një ditë më parë u rrëzua një shtetase në Elbasan dhe më pas humbi jetën në spital, është arrestuar. Policia konfirmoi se ai ka kryer manovra të rrezikshme.
Ngjarja
Pasditen e djeshme, në fshatin Tregan të Elbasanit, një autobus me rreth 15 pasagjerë ka pësuar defekt.
Sipas raportimeve të para mediatike, në momentin që mjeti pësoi defekt, një pasagjere, nga frika dhe paniku është hedhur për të shpëtuar. Por, këtë të Shtunë, policia konfirmoi se ajo nuk është hedhur, por u rrëzua nga mjeti.
Si pasojë e plagëve të marra, gruaja është transportuar me urgjencë në drejtim të spitalit të Elbasanit, por pavarësisht ndihmës së mjekëve ndërroi jetë.
Pasagjerët e tjerë raportohet se nuk kanë shfaqur probleme, ndërsa pas ngjarjes shoferi u shoqëruar për t’u marrë në pyetje, ndërsa nisën hetimet për ngjarjen.
Arrestimi
Këtë të Shtunë, policia konfirmoi arrestimin e drejtuesin e mjetit, duke deklaruar se ai ka kryer manovra të rrezikshme.
“D.P., 49 vjeç, banues në Elbasan, u vu në pranga pasi në fshatin Tregan, duke drejtuar mjetin autobus ka kryer manovra të rrezikshme dhe për pasojë është rrëzuar nga autobusi pasagjerja – shtetasja M. K., 47 vjeçe, banuese në fshatin Jagodinë, Elbasan, e cila për shkak të plagëve të marra ndërroi jetë në spital”, njoftoi policia.
