Një vrasje ka ndodhur në orët e vona të mbrëmjes së të premets në Shkodër. Nga të dhënat e para mësohet se ngjarja ka ndodhur në fshatin Bardhaj.
Viktima është identifikuar si Emiljano Ndou, 25 vjeç, ndërsa raportohet se vrasja është kryer me armë zjarri.
Në Shkodër kanë ndodhur një seri ngjarjesh të rënda dhe ekzekutime gjatë muajve të fundit, ndërsa ato janë trajtuar si përplasje mes grupeve kriminale që veprojnë në këtë qytet.
Rreth dy javë më parë u ekzekutua me të paktën 7 plumba Endri Mustafa, i cili u gjet në zonën e njohur si Livadhet. Viktima ishte qëlluar me 3 plumba në kokë, 1 në gojë dhe 3 në kraharor.
Ndërkohë në fshatin ku ndodhi krimi i mbrëmjes së të premtes, u ekzekutua me breshëri automatiku, Bardhok Pllanaj. Atij iu bë pritë me 4 prill të këtij viti dhe u ekzekutua me 40 plumba.
Po në fshatin Bardhaj, pak më herët pati një përplasje më armë mes dy vëllezërve Marjan dhe Hot Doçi që mbetën të plagosur. Policia ka shpallur në kërkim 29-vjeçarin Besmir Perkolaj, i cili akuzohet se ka plagosur me armë zjarri dy të rinjtë.
Vrasjet gjatë muajit maj
Gjatë muajit maj 6 persona janë ekzekutuar me armë zjarri në Vlorë, Tiranë, Elbasan dhe Shkodër.
Në datë 10 Maj në Vlorë u ekzekutua Bledar Birçaj në një atentat mafioz në mes të ditës. Mbrëmjen e po asaj dite u vra te zona e “5 Majit” në Tiranë Mehmet Qema.
Një ditë më pas e kishte radhën Elbasani. Everest Çaka 41-vjeç u qëllua për vdekje në sy të gruas brenda në makinë. Në 17 Maj tronditet Shkodra. Endri Mustafa gjendet i vdekur te zona e Livadheve i ekzekutuar me armë zjarri.
Javën e kaluar, sërish krimi goditi në Vlorë duke i marrë jetën Delon Troqes, ndërsa mbrëmjen e sotme një tjetër vrasje u regjistrua në Shkodër.
Vrasjet në muajin Maj
10 Maj-Vritet Bledar Birçaj në Vlorë
10 Maj-Vritet Mehmet Qema në Tiranë
11 Maj-Vritet Everest Çaka në Elbasan
17 Maj-Vritet Endri Mustafa në Shkodër
21 Maj-Vritet Delon Troqe në Vlorë
28 Maj-Vrasje në Shkodër
