“Nga padia në Francë kundër Sekretarit amerikan të Shtetit, Antony Blinken, nuk pres asnjë gjë tjetër, veçse dinjitetit tim”, tha ish-Kryeministri Sali Berisha në emisionin Politikon, në Oranews.
Berisha tha se kjo ishte e parë në 77 vitet e jetës së tij që i drejtohej Gjykatës për një person.
“Avokati im është optimist, por gjithçka varet nga gjykatësi”, tha Berisha, duke shtuar se “nuk do të bashkohet kurrë me anti-amerikanizmin”.
Berisha e cilësoi vendimin e DASH si të pabazuar në prova dhe fakte.
“Nuk ka prova dhe fakte, gjithçka është bazuar në informacionet e OJQ të George Soros, apo mediave që kontrollohen nga Edi Rama.
Soros është njeriu më i fuqishëm në Botë, jashtë ofiqeve politike”, tha Berisha.
Ai u shpreh se nuk është rastësi që emri i tij dhe familjarëve të tij u përfshinë në listën e zezë në këtë kohë.
“Menduan se do më godisnin, por në të vërtetë patën efekt të kundërt. Unë s’kam bërë asnjë orë fushatë në zgjedhjet e fundit parlamentare dhe u kërkoj ndjesë qytetarëve që nuk kam bërë qoftë edhe 1 orë fushatë.
Unë e kam vendosur faqen zyrtare timen në FB në funksion të kandidatëve dhe PD, por jo të Sali Berishës. Kam pasur një vendim timin, që nuk doja të çaja fushatën, dhe besoja se ne do të fitonim dhe në këtë kontekst kam bërë gjithçka që të realizohej fitorja”, tha Berisha.
