Të mërkurën e 7 Dhjetorit u njoftua se Drejtori i CIA-s John Brennan, kishte zhvilluar në Tiranë disa takime me personalitete shtetërore.
Shumicën e orëve të paradites, Brennan e kaloi me homologun e tij Visho Ajazi, ndërsa takimet vijuan me Presidentin Nishani, kryeministrin Edi Rama, ministren e Mbrojtjes Kodheli dhe Drejtorin e Përgjithshëm të Policisë, zotin Haki Çako.
Zoti Çako dukej si një përjashtim nga rregulli, ndërsa një burim konfidencial i informuar me përgatitjet e vizitës, i tha Hashtag.al se ka qenë ministri Tahiri ai që ka synuar një takim me shefin e CIA-s, por kërkesa është shmangur me lezet.
“Në momentin kur po rakordohej axhenda e takimeve, përfaqësues të ambasadës së SHBA në Tiranë kishin sugjeruar dhe një takim me ministrin Tahiri. Por nga stafi i zotit Brennan u përgjigjën me diplomaci se nuk ishte i nevojshëm ky takim, meqenëse Tahiri do ishte prezent në takimin që Brennan do të zhvillonte me kryeministrin Rama. Përfaqësuesit e ambasadës nuk këmbëngulën më tej pas kthimit të përgjigjes refuzuese, ndonëse mund të kenë mbetur të zhgënjyer nga përgjigja që morën”, tha burimi.
