Struktura të rëndësishme arkeologjike janë gjetur në Gjirokastër, në vendin ku po bëhen punimet për ndërtimin e parkimit nëntokësor në sheshin Çerçiz Topulli.
Punimet kanë nisur prej dy muajsh, ndërsa mësohet se janë ndërprerë dy ditë më parë, pasi në një pjesë të sheshit, gjatë gërmimeve janë zbuluar struktura të rëndësishme arkeologjike, gjurmë të shumta të qeramikës, si edhe materiale skeletore. Sipas arkeologëve kjo përbën një pjesë tepër të rëndësishme të historisë së dikurshme të Gjirokastrës.
Mësohet se më herët në shesh janë gjetur edhe puse, por firmat ndërtuese i kanë mbuluar duke mos i dhënë asnjë lloj vlere dhe rëndësie gjetjeve.
Nga njëra anë qytetarët, nuk duan që të ndalojnë punimet, ndërkohë arkeologët që ia dinë vlerat thonë se nuk duhet të mbulohen, këto gjetje sikur është bërë edhe më parë.
Në pjesën që janë bërë gjetjet punimet janë pezulluar ndërsa në pjesën tjetër vijon puna.
