Presidentit i Republikës Ilir Meta ka refuzuar sërish sot (24 maj 2021) të paraqitet në seancën dëgjimore të komisionit hetimor, duke humbur edhe afatin e fundit e vendosur nga 9 deputetët.
Në letren e dytë drejtuar Kuvendit, Kreu i Shtetit pak minuta para mbledhjes së komisionit ua bënë të qartë Parlamentit se ata e humbën mundësinë për ta dëgjuar atë në komisionin e ligjeve.
“Kuvendi e humbi mundësinë që nëse do të donte të zhvillonte një seancë dëgjimore me Presidentin e Republikës, ta zhvillonte atë sipas kërkesës së tij, në datën 10 maj 2021, duke e mohur këtë kërkesë në mënyrë arbitrare dhe të orientuar politikisht. Gjithsesi, Presidenti i Republikës nuk mund të diskutojë, por dhe as të dëgjohet nga një strukturë e ngritur në Kuvend, që nuk ka legjitimitet dhe nuk duhet të ekzistojë sipas Kushtetutës dhe ligjit” shkruan presidenti Ilir Meta.
Refuzimi i radhës i Metës ka irrituar socialistët, të cilët kërkuan që ta sillnin Presidnetin me forcë në seancë.
“Presidenti ka detyrimin të sillet edhe me forcë, të gjejë mjetet. Por do të thotë se s’ka vullnet të njohë këtë komision. Kur ky President në pozitën e kryeministrit në atë kohë e mori me dhunë misterdepulesën. Ashtu siç Berisha e ka marrë me dhunë në ‘94. Ishin këta skenarë të kurdisur midis tyre”, tha Spartak Braho.
Por disa prej anëtarëve të komisionit që në shtator nuk do të jenë më deputetë propozuan që të mos ndërmerret një veprim i tillë për të mos e çuar më tej krisjen politike dhe institucionale mes Presidentit dhe Parlamentit.
Nëntë deputetët në përfundim të hetimit parlamentar për të shkarkuar Metën kanë mbledhur edhe shqetësimet e qytetarëve, të cilët sipas Alket Hysenit janë shqetësuar për sjelljen e Presidentit.
Brenda kësaj javë komisioni hetimor duhet të dorëzojë në Parlament raportin përfundimtar për shkarkimin e Ilir Metës nga posti i Presidentit, me akuzën shkelje të rëndë të Kushtetutës me deklaratat publike para dhe gjatë fushatës elektorale.
