Myslym Ismailaj, ish-shefi i Seksionit për Hetimin e Aksidenteve në Policinë e Vlorës, që u arrestua me dyshimin se kishte tentuar të favorizonte firmën e ndërtimit të Lungomares, kërkon që aksidenti të rihetohet.
Në një intervistë për Panorama, pak ditë pasi Gjykata e Vlorës vendosi masën detyrim paraqitjeje, ndaj tij, Ismailaj shpjegon:
“Realisht janë vrarë dy të rinj. Janë bërë të gjitha veprimet hetimore në vendin e ngjarjes. Me të shkuar në në vendngjarje, i kam dhënë informacion sallës operative….
Më është kërkuar që të thirret edhe të pyetet i gjithë stafi drejtues I zbatimit të projektit të firmës, e cila kryen punimet.
U thirrën?
Pas shumë telefonatash, kontaktoj me një shtetas që u prezantua si administrator i firmës, e kam pyetur se ku ishte dhe më ka thënë që ishte në Tiranë. I jam prezantuar se kush jam dhe që isha në Drejtorinë e Policisë së Vlorës. I kam thënë që të paraqitet së bashku me stafin teknik të zbatimit të projektit duke I thënë se për dy orë duhej të ishin në Drejtorinë e Policisë së Vlorës për hetim. “Mirë, në rregull”, më tha. Pas pak minutash, pasi nuk i mora të gjitha të dhënat e sakta, emërtimin e firmës dhe pozicionin që kishte, e kontaktova prapë. E pyes dhe më dha emrin e firmës dhe të kontraktorit,. E pieta për pozicionin dhe më tha që ishte administrator. Rreth një orë më vonë kam kontaktuar prapë me administratorin e firmës dhe më ka thënë që ishte në Durrës. “Mirë i thashë, mirëardhsh” dhe kam mbyllur telefonatën.
Me kalimin e kohës, mbasi kisha mbyllur edhe veprimet e tjera dhe kisha gati shkresat për t’i dërguar, i kam kërkuar nëndrejtorit të Policisë një specialist të antikrimit. Nëndrejtori më dha miratimin e tij për specialistin.
Pas pak kam qenë në zyrën e tij, të nëndrejtorit dhe më ka thënë që kemi një problem. E pyeta se kush ishte problem. “Drejtuesi i firmës nuk mund të vijë, është në Korçë me familjen,” më tha. Përsa i përket hetimit mbi firmën e ndërtimit, këtu ndërpriten marrëdhëniet e mia me firmën e ndërtimit. Që nga ai moment, unë nuk bëra asnjë veprim në atë drejtim. Sesi është hetuar firma e ndërtimit, sesi e kam favorizuar unë firmën e ndërtimit, sesi e kam bërë unë atë allishverishin me firmën e ndërtimit, sesi e kam menduar unë të tjetërsoj aksidentin me firmën e ndërtimit, këtu ndërpritet e gjithë korrespodenca ime me firmën. Me personin që kam folur, se unë vetëm me një person kam folur, më tha se ishte administrator…
…Më është kërkuar që të bëj një rikëqyrje të vendit të ngjarjes të cilin nuk e kam pranuar dhe nuk pranoj kurrë.
Pse duhej bërë rikëqyrja? Pasi ishte rregulluar ajo që mund të ishte e dëmtuar?
Nuk aludoj. Nuk më lejohet të aludoj profesionalisht. …Momentalisht unë kërkoj një rihetim të kësaj ngjarjeje. Një hetim të plotë në të gjtiha drejtimet që të dalë e vërteta.
