Zhan Viktor, një nga autorët e golave në fitoren ndaj Kukësit, që hipotekoi edhe objektivin “mbijetesë”, komentoi këtë arritje sezonale të klubit korçar.
Duke folur për “Panorama Sport” ai diskutoi edhe për mundësitë që ka Skënderbeu për trofe këtë edicion, teksa është në finale ndaj skuadrës së Vllaznisë.
“Ia dolëm! Kjo është kënaqësia më e madhe për ne, më pas vjen goli im. Jam shumë i lumtur që arritëm të bëjmë më të mirën për këtë ekip dhe të marrim atë që kishim kërkuar prej kohësh. E gjetëm ekipin në një moment të vështirë dhe mundëm të rikuperonim pikë me vlerë për të arritur mbijetesën.
Tani të relaksohemi dhe të shikojmë këtë sukses për të menduar më pas për ndeshjen e Kupës. Jemi në finale dhe gjithçka mund të ndodhë. Ne do të luajmë gjithçka për gjithçka.
E duam shumë atë Kupë dhe do të ishte një vlerë e shtuar për ne. Jam i bindur se mund t’ia dalim prandaj duhet të jemi të përqendruar dhe të bëjmë më të mirën. Gjithçka është e mundshme”, ka deklaruar Zhan Viktor.
