Është arrestuar në Zvicër Mirko Rosa, ish-mbreti i tregtisë së arit në zonën e Legnanese. Në rrjetet sociale, ai sfidoi policinë për ta gjetur, duke u përpjekur të devijonte kërkimet e tyre.
Një dënim i marrë prej gjashtë vjetësh për akuza si mashtrim, keqtrajtim në familje, dhunë, vrasje të kafshëve, pastrim parash, botim arbitrar i akteve të procedurave penale, simulim i krimit dhe rezistencë ndaj zyrtarëve publikë, i ishte dhënë në mungesë.
Në muajt e fundit, sipërmarrësi 46-vjeçar italian ishte arratisur nga Italia dhe ishte zhvendosur në vende të ndryshme të Bashkimit Evropian.
Policia italiane ishte duke monitoruar lëvizjet e tij në gjysmën e Evropës, deri sa e gjeti “strehën” e tij në Zvicër.
Ai postonte në arrati edhe video në të cilat zemëroi forcat e policisë, duke i “sfiduar” ata hapur për ta gjetur.
Policia Zvicerane arriti ta arrestonte, duke e çuar në burgun “La Farera” në Lugano në pritje të ekstradimit të tij.
Në videot dhe postimet e tij në rrjetet sociale, përveç provokimeve dhe fyerjeve ndaj policisë, sipërmarrësi vlerësonte shtetin shqiptar dhe sidomos Kanunin, kodin e së drejtës zakonore shqiptare që rregullonte nderin, betimet si dhe hakmarrjen.
Fakti që ai e njeh mirë vendin tonë, ka ngritur dyshime se ka pasur miq por ndoshta edhe bashkëpunëtorë shqiptarë.
Nuk është e sigurt që gjithçka mbaron me arrestimin e tij. Hetimet në fakt po vazhdojnë për të rindërtuar marrëdhëniet ndërkombëtare të 46-vjeçarit nëse do të konstatohet ndonjë përgjegjësi e atyre që mund ta kenë ndihmuar në fshehjen e tij.
