Policia e Korçës mori në pyetje 24-vjeçaren Marsela Toshi nënën e 2 fëmijëve të vrarë nga bashkëshorti i saj i cili më pas vrau edhe veten. Mësohet se Marsela disa orë para vrasjes makabër u kthye në shtëpi për të marrë fëmijët, por hasi në kundërshtimin e bashkëshortit Naum Toshi.
Ajo ka pohuar në polici se ditën e dielë ka pasur grindje mes tyre. “Ika në Greqi që të punoja, burri s’më ka dhunuar. Do shkoja të gjeja shtëpi dhe punë në Greqi dhe do i merrja. Burri më thoshte na gjej për të ngrënë, bëj çfarë të duash. Ai më thoshte ke fëmijë për të ushqyer, bëj ç’të duash me trupin tënd. U zumë dhe ika”, ka thënë ajo në polici.
Ndërsa policia e Korçës ka proceduar penalisht nënën e dy fëmijëve që u mbytën nga babai i tyre, ngjarje kjo e ndodhur ditën e djeshme. Në një njoftim shpërndarë për mediat, policia e Korçës thotë se ka filluar ndjekjen penale ndaj 24-vjeçares, Marsela Toshi.
“Procedimi ndaj saj ka filluar pasi, kjo shtetase ka braktisur dy fëmijët e saj të mitur dhe më pas është larguar për në shtetin Grek, konkretisht shtetasit J.T dhe V.T të moshave 7 dhe 4 vjeç, trupat e të cilëve u gjetën të pajetë, së bashku me trupin e bashkëshortit të kësaj shtetaseje më datë 05.12.2016 në banesën e tyre, në lagjen nr 4 Korçë.”, thuhet në njoftimin e policisë.
Materialet i kaluan Prokurorisë të Rrethit Gjyqësor Korçë për veprën penale: “Braktisja e fëmijëve të mitur”.
