Ditën e djeshme, në media u raportua se Interi i ka kërkuar lojtarëve të heqin dorë nga bonuset e fitimit të titullit dhe të reduktojnë pagën e vitit të ardhshëm me rreth 15%. Pas kësaj u tha se lojtarët janë të acaruar nga kjo kërkesë e klubit dhe se ata nuk kanë pranuar.
Sot në lidhje me këtë çështje ka folur CEO i Interit, Beppe Marotta. Ai shprehet se nuk është e vërtetë se lojtarët janë të mërzitur dhe se do paguhen të gjitha pagat e sezonit, bashkë me bonuset. Por Marotta shton se klubi nuk është në gjendje të mirë financiare dhe do i kërkojë lojtarëve reduktime të rrogave të tyre.
“Nuk është e vërtetë që ka prishje humori te futbollistët. Ne jemi të gjithë krenarë për atë që kemi arritur dhe na takon ta festojmë e shijojmë deri në fund, pasi veçanërisht djemtë kanë derdhur shumë djersë në fushë gjatë këtij viti. Detyrimet kontratuale do të shlyhen të gjitha, përfshirë edhe bonuset mbi paraqitjet apo titullin, pasi janë një arritje e merituar për futbollistët. Është e vërtetë që kemi vështirësi ekonomike, por nuk jemi vetëm ne. Shumë klube në Europë po vuajnë, pasi stadiumet e boshatisura për shkak të pandemisë kanë ulur ndjeshëm arkëtimet. Ne kemi mbajtur të gjithë detyrimet kontratuale deri tani, por është momenti që të bëjmë një lëvizje për të ardhmen, pasi nëse vazhdohet kështu, shumë klube do të shkojnë drejt falimentimit. Do të flasim me lojtarët një e nga një dhe do t’i sqarojmë për gjithçka, duke shpresuar që do të gjejmë mirëkuptimin e tyre, pasi janë të gjithë profesionistë dhe e kuptojnë situatën”, u shpreh Marotta.
