Detaje të reja janë zbuluar nga ngjarja e rëndë që ka ndodhur mëngjesin e sotëm në Korçë ku babai vari dy fëmijët e tij të mitur dhe më pas vrau veten. Mësohet se ai ka lënë një letër pas krimit makabër ku shkruan: “Ngjituni lart”.
Motra e babait që vari dy fëmijët dhe pastaj edhe veten ka rrëfyer tmerrin. Lindita Golka, motra e Naum Toshit ka treguar se ka qenë babai ai që ka gjetur tre viktimat në katin e dytë të banesës.
“Vëllai jetonte vetëm me dy fëmijët, gruaja ishte larguar para dy muajsh”¬ ka thënë motra.
Ajo ka thënë se trupat e pajetë i ka gjetur babai. “Babai në mëngjes gjeti një letër te dera që shkruhej, “ngjituni lart”¬ thotë ajo.
Më pas babai është ngjitur në katin e dytë të banesës dhe ka parë tmerr me sy, teksa ka parë tre trupat e pajetë. Mësohet se bashkëshortët kishin disa vite që jetonin në emigrim, në Greqi dhe kishin vetëm pak kohë që ishin kthyer. Panorama.al mëson se çifti kishin rreth 6 vite të martuar dhe djali i madh ishte nga një lidhje e mëparshme e gruas. Pak kohë më parë gruaja ishte larguar për arsye që ende pritet të sqarohen dhe i kishte lënë të dy fëmijët bashkëshortit në banesë. Krimi ka ndodhur gjatë natës, ndërkohë që trupat janë gjetur mëngjesin e sotëm.
