Masakër në Brazil. Të paktën 25 persona, përfshirë një oficer policie janë vrarë në një shkëmbim zjarri në Rio de Janeiro, sipas mediave lokale.
Shkëmbimi i zjarrit ndodhi gjatë një operacioni policor në zonën Jacarezinho të qytetit.
Policia Civile nisi operacionin pasi mori njoftime se trafikantët e drogës po rekrutonin fëmijë për bandën e tyre.
Dy pasagjerë në një tren të metrosë që u goditën nga plumbat, mbijetuan.
Policia Civile në qytet konfirmoi vdekjen e një prej oficerëve të tyre, inspektorit të policisë Andre Leonardo de Mello Frias.
Sipas lajmeve lokale, banda e shënjestruar në këtë bastisje përfshihet në trafik droge, vrasje dhe rrëmbime.
Rio de Janeiro është një nga shtetet më të dhunshme të Brazilit dhe zona të mëdha të qytetit janë nën kontrollin e kriminelëve, shumë prej tyre të lidhur me banda të fuqishme të trafikut të drogës.
Forcat e sigurisë në Brazil shpesh janë akuzuar për përdorim të tepruar të forcës kundër popullatës civile gjatë operacioneve në qytetet e mëdha.
