Vendet evropiane po bëhen gati për të nisur sezonin turistik. Ndonëse pandemia nuk është zhdukur, ky vit ndryshe nga ai që lamë pas duket më premtues sa i përket industrisë së turizmit. Italia po harton planin e saj strategjik se si do të bëhet turizëm këtë verë.
Kryeministri Mario Draghi njoftoi se pasaporta e vaksinimit do të jetë gati në gjysmën e dytë të qershorit. Ndërkohë, qeveria italiane ka prezantuar një leje kombëtare të gjelbër për personat e vaksinuar, e cila do të jetë efektive nga gjysma e dytë e majit.
“Bota dëshiron të udhëtojë në Itali. Pandemia na ka detyruar të mbyllemi por ne jemi gati të mirëpresim sërish turistë. Vendi po hapet gradualisht. Disa sektorë janë të destinuar të tkurren, por të tjerët të rriten dhe unë nuk kam asnjë dyshim se turizmi në Itali do të kthehet më i fortë se më parë”, u shpreh Ministri i Turizmit Massimo Garavaglia.
Turizmi vazhdon të jetë një nga sektorët më të goditur nga pandemia. Sfida më e madhe e këtij shekulli la 62 milionë njerëz të papunë. Rifillimi i udhëtimeve dhe turizmit janë dy pikat kyçe për rimëkëmbjen ekonomike globale.
