“Fushata jonë nuk ka mbaruar”, Basha i jep porositë kandidatëve për deputet

Kreu demokrat Lulzim Basha po zhvillon një mbledhje të zgjeruar me anëtarët e kryesisë dhe kandidatët për deputet në zgjedhjet e 25 prillit, ku ka vënë theksin në atë që e quan si vjedhjen e votave më të madhen në historinë e pluralizmit shqiptar nga Ed i Rama dhe Tom Doshi.

“Dua të falenderoj secilin nga ju. Ju keni punuar shumë fort me besimin e palëkundur në rrugën tonë, në demokracinë tonë, në vendin tonë. Pavarësisht vjedhjes më të madhe të votave në historinë e Shqipërisë të kryer nga Rama-Doshi, ne sollëm një arritje të madhe për partinë tonë dhe për vendin tonë”, tha Basha.

Në vijim, raportohet se kreu demokrat ka folur me nota optimiste, kur tha se “pa hequr dorë nga vlerat tona, ne u bëmë më të fortë kudo”.

“Tani do të luftojmë me të gjitha fuqinë tonë deri në fitore. Fushata jonë nuk ka mbaruar, ajo vazhdon me energji maksimale.

Unë do takoj njerëzit në terren, për t’i falënderuar, për të biseduar me ta, për t’i dëgjuar, duke ju kërkoj që edhe ju të bëni të njëjtën gjë në ditët në vijim. Së bashku do të fitojmë!”, tha Basha.