Partizani shpallet fitues i Kupës së Shqipërisë në basketboll për femra, pas fitores 89-85 ndaj Flamurtarit në finale.
Në ndeshjen e zhvilluar në mjediset e Akademisë “Dhimitraq Goga” në Durrës, u zhvillua një ndeshje tepër e luftuar nga të dyja ekipet, që dhuruan një ndeshje të mirë e me rivalitet, ku secila mund të ishte shpallur fituese.
Partizani pati një epërsi të lehtë në shumicën e ndeshjes, duke udhëhequr me 4-5 pikë, por pa mundur të shkëputet. Kjo pamje është thuajse për 30 minuta. Në periodën e katërt, Flamurtari arrin të barazojë dhe të dalë përpara 3-4 pikë, duke e ruajtur këtë avantazh deri në fund, duke dhënë përshtypjen se do të fitonte ndeshjen.
Në sekondën e fundit, në avantazhin 76-73 për Flamurtarin, shkaktohet një faull në favor të ekipit kryeqytetas, me Dishnicën që fiton 3 gjuajtje të lira. Ajo i realizon të trija dhe barazon shifrat 76-76, duke çuar takimin në kohën shtesë. Ekuilibër edhe në kohën shtesë, ku rezultati barazohet disa herë.
Në sekondat e fundit ndeshja tensionohet, me trajnerin e Flamurtaruit që merr teknike përjashtimi, hyn në fushë dhe tenton të godasë gjyqtarët. Kjo ndihmon të “kuqtë”, që shkëputen 4 pikë dhe më pas fitojnë 89-85, duke nisur festën, pas një pritje të gjatë pa trofe. Meritë ka edhe trajnerja Ledina Çamishi, që udhëheq një ekip vetëm me basketbolliste vendase.
