Gjykata e Tiranës ka lënë në burg, Rudolf Nikollin, 34-vjeçarin i cili tre ditë më parë hyri në xhaminë “Dine Hoxha” në rrugën e Kavajës dhe plagosi me thikë 5 persona.
Fillimisht ai u ndalua nga besimtarët që ndodheshin në xhami e më pas u shoqërua në polici. Hetimet për këtë ngjarje së pari u kryen nga antiterrori. Sipas gjykatës fillimisht nuk mund të vendosnin shtrimin në një spital psikiatrik se nuk kishte prova dhe në këtë mënyrë për të parandaluar ndonjë vepër tjetër, gjykata vendosi ta mbajë atë në burg, deri në marrjen e përgjigjes së ekspertizës për gjendjen e tij mendore.
Në dëshminë paraprake i riu përpara agjentëve të antiterrorit u shpreh se sulmin me thikë në xhami e kreu pasi prej shumë kohësh besimtarë myslimanë e përndiqnin deri në shtëpinë ku ai jetonte. Sipas tij ata e shoqëronin vazhdimisht deri në banesë duke e shikuar por asnjëherë nuk i kanë folur. Për të riun prokuroria fillimisht ngriti akuzën e veprimeve me qëllime terroriste, për shkak të vendit ku edhe ndodhi krimi. Ndërkohë që janë duke u kryer edhe ekspertiza të shëndetit mendor ndaj Nikollit, pasi ka dyshime se i riu vuan nga probleme të shëndetit mendor.
I riu që plagosi pesë persona, për një kohë të gjatë ka punuar si picier në Strugë, ku sipas tij ka ndihmuar një person të besimit mysliman.
