Nga BoldNews.al
Në kulmin e pandemisë nga Covid-19, kur qytetarët shqiptarë u gjendën në vështirësi ekstreme ekonomike, kryetari i Bashkisë së Tiranës vendosi të shpenzojë plot 100 milionë lekë të vjetra të taksapaguesve për të propaganduar imazhin e tij.
Një dokument i siguruar nga “Boldnews.al” tregon se Këshilli Artistiko-Kulturor i Bashkisë së kryeqytetit miratoi projektin “Tirana për njëri-tjetrin”, i propozuar nga Qendra “Media dhe Çështjet Shoqërore”.
Projekti, sipas asaj që deklarohet zyrtarisht, ishte promovimi i heronjve të heshtuar gjatë pandemisë, përfshirë mjekët, infermierët dhe personazhe të tjerë publikë.
Për realizimin e këtij projekti, Këshilli Artistiko-Kulturor i Bashkisë së Tiranës vendosi në dispozicion 100 milionë lekë të vjetra.
Ky fond i kaloi televizionit “Euronews Albania”, për realizimin e 20 puntatave me nga 10 minuta secila, të cilat përfshinin një periudhë 6-mujore.
Por, këto puntata nuk do të transmetoheshin në televizion. Sipas vartësve të Erion Veliajt, emisionet e shkurtra do të publikoheshin në rrjetin sociale të televizionit, “me qëllim për të marrë një audiencë më të madhe”.
“Boldnews.al” verifikoi faqen zyrtare në rrjete sociale të Qendrës “Media dhe Çështjet Shoqërore”, ku dallohen lehtësisht se ajo i ka bërë një fushatë të gjerë propagandistike kryetarit të Bashkisë së Tiranës, Erion Veliaj.
Nga ana tjetër, televizioni “Euronews Albania”, pas përfitimit të këtij projekti, ka zhvilluar një proces të gjerë sondazhimi për zgjedhjet e përgjithshme të 25 Prillit 2021, në të cilat rezulton gjithnjë fituese Partia Socialiste dhe një rritje e ndjeshme e kësaj force në Tiranë, ku fushata drejtohet nga Erion Veliaj.
Krahas, këtij shpenzimi “100-milionësh”, Veliaj ka vendosur në dispozicion të Top Channel edhe një shumë tjetër prej 40 milionë lekësh nga taksat e qytetarëve, gjithnjë në favor të imazhit të tij.
Fondacioni “Dritan Hoxha”, nën kontrollin e drejtuesve të televizionit “Top Channel” ka përfituar rreth 45 milionë lekë nga Bashkia e Tiranës, për realizimin e projektit “Ora e Tiranës”.
Në puntatat video të këtij projekti, stafi përgatitës është kujdesur që të promovojë sa më mirë imazhin e “paguesit”, pra kryebashkiakut të Tiranës, Erion Veliaj.
Referuar të dhënave zyrtare nga Transaksionet e Thesarit, Bashkia e Tiranës ka shpenzuar edhe dhjetra milionë të tjerë për projekte kulturore, thuajse “fantazëm”, të cilat nuk rezulton të kenë sjellë asnjë impakt domethënës në jetën e kryeqytetit.
Këto qindra milionë lekë të qytetarëve të goditur nga pandemia duket se kanë pasur për qëllim vetëm shfaqjen mediatike të kryebashkiakut të Tiranës.
