Kreu i KMSH-së, Bujar Spahiu, ka reaguar pas sulmit me thikë në xhaminë “Dine Hoxha” mesditën e sotme në Tiranë nga një person që dyshohet se vuan nga problemet e shëndetit mendor. Spahiu kërkon zbardhjen e ngjarjes.
“U informova nga Myftiu i Tiranës, z. Lauren Luli, dhe nëpërmjet medias, për ngjarjen e fundit në Xhaminë Dine Hoxha.
Sipas imamit Kalaja dhe besimtarëve dëshmitarë të pranishëm, një përson i jashtëm ka hyrë nga rruga në xhami duke plagosur me mjet prerës besimtarët dhe personelin e pranishëm në xhami.
Fatmirësisht besimtarët e lënduar janë jashtë rrezikut për jetën.
I lutemi Zotit për shërimin e tyre sa më të shpejtë”, thuhet në reagimin e KMSH.
Në vijim, KMSH kërkon që organet përkatëse të zbardhin sa më parë ngjarjen, e cila lëndoi besimtarët në këto ditë ramazani.
Rudolf Nikolla nga Mati plagosi pasditen e së hënës pesë persona që ndodheshin në ambientet e xhamisë “Dine Hoxha”. Të plagosurit janë të gjithë të rinj; 35-vjeçari Donald Koçi, 22-vjeçari Saba Peposhi, Mariglen Konja, rreth 24 vjeç dhe Anri Tola, rreth 23-vjeç.
Dyshohet se Nikolla vuan nga probleme të shëndetit mendor. Ndërkohë, ende nuk dihen motivet që mund ta kenë shtyrë 34-vjeçarin që të kryejë aktin ekstrem pasi nuk kemi ende një dëshmi të plotë të tij. Nga hetimet paraprake, nuk rezulton që autori të ketë pasur njohje me të plagosurit.
