Finalet në Superiore dhe Kategorinë e Parë nuk kanë fund dhe sot do të zhvillohen të tjera, duke nisur prej orës 13:00. Apolonia do mundohet të surprizojë Vllazninë në shtëpi dhe vetëm tre pikët i bëjnë punë fierakëve, për të mbajtur gjallë shpresat për të qëndruar në Superiore.
Nga ana tjetër shkodranët duhet t’i përgjigjen Partizanit që fitoi një ditë më parë me Kastriotin. Me Apoloninë skuadra e Brdaric nuk ka gabuar asnjëherë këtë sezon dhe sigurisht që dëshiron ta vazhdojë këtë traditë pozitive.
Në 16:00 zhvillohen duelet e tjera dhe sytë janë në Korçë dhe Laç. Skënderbeu, pasi dje humbi Kastrioti ka mundësinë të ushtrojë presion edhe më shumë në rast fitoreje. Gjithsesi për korçarët nuk është një mision i lehtë, pasi ndeshet me Teutën që do tre pikët që e rikthejnë në krye të kampionatit.
Laçi gjithashtu kërkon të ruajë ritmin e skuadrave kryesuese dhe sot është i dënuar të rikthehet te rezultatet pozitive. Kurbinasit presin Bylisin, që ka nevojë për pikë më shumë se kurrë dhe pritet që të jetë një duel i luftuar, si zakonisht, mes këtyre dy skuadrave.
Në Kategorinë e Parë ka betejë për vendin e parë dhe sot luhet një ndeshje shumë vendimtare në Peqin. Egnatia, e shkëputur me 4 pikë nga Tomori, ka mundësinë që me një fitore t’u japë një goditje të fortë beratasve që ëndërrojnë ende rikthimin në elitë.
Pogradeci sot ka mundësinë të fitojë në shtëpi ndaj Besës dhe ndoshta një barazim mes kryesuesve do i fuste ata në garë dhe gjithçka në grupin B do të bëhej shumë interesante. Kavajasit, pas largimit të Mergjyshit, drejtohen nga Kashami dhe do mundohen të respektojnë kampionatin deri në fund. /abcnews.al
